Nigeria：經濟新星抑是動亂戰場

西非洲大國Nigeria（奈及利亞）已經確定無欲佮罷免蔡正元立委仝一工，佇2月14號來舉行總統佮國會的[ê]大選。in欲延六禮拜，到3月底才[tsiah]來投票。

當然Nigeria的選舉延期佮蔡正元無啥關係，蔡正元的罷免案，佇這禮拜六，愛由台北市內湖佮南港區選民來投票決定的這件代誌，橫直袂當宣傳，佇全世界照講嘛無遐爾出名。Nigeria政府宣布延期的理由，是北部的偏激Islam組織Boko Haram作亂，政府無法度保護選民佮確保選舉順序[sūn-sū]進行。

實際上的理由可能比這閣較複雜一寡。反對派認為，這是政府的借口佮漚步，因為追求連任的總統Goodluck Jonathan照目前的範勢，真可能會輸予反對派候選人Muhammadu Buhari，來失去人民民主黨已經維持16年的政權。

反對派質疑，政府佇過去六年攏無法度消滅Boko Haram，那會有可能佇六禮拜以內處理好勢？到時陣無定會閣喝延期。

Boko Haram佇世紀初成立，uì 2009年開始軍事行動，目標是建立一个政教合一的Islam國家 。Boko Haram真正驚動世界，是2014年4月綁架200外个查某中學生，大部分這陣攏猶閣下落不明。舊年底到今年初，Boko Haram閣四界升高攻擊，刣死的人數估計數百到數千。六年來，Nigeria政府估計衝突中死亡的人數攏總已經有1萬9000。另外150萬人逃難。

最近，鄰國Chad、Niger佮Cameroon攏已經派軍抑是決定派軍，加入圍剿Boko Haram，這已經是一場超國界的區域戰爭。

《經濟學人》週刊講，Boko Haram的動亂若是繼續落去，可能會共Nigeria拆散，「對Nigeria國民佮世界帶來悲慘的後果」。

Nigeria是非洲上大的經濟體，伊1.8億的人口嘛是非洲第一。才一年外前，2013年底，前美國高盛（Goldman Sachs）集團的經濟學家Jim O’Neill提出四个今後20年世界上的經濟明星國家，伊共號做MINT，就是Mexico、印尼、Nigeria，佮Turkey。O’neill上出名的，是十幾年前提出BRIC，磚角四國，影響非常深遠，所致這擺伊新的預言也受著全球的重視。

MINT，台灣一般翻作「薄荷四國」，毋過可能愛共翻作「造幣四國」，更加符合經濟利益的主題。

咱這馬翻頭看，O’Neill一年外前咧描畫Nigeria光明的經濟展望的時，會使講完全無討論著Boko Haram佮政治不穩定的問題。

O’neill彼時陣和英國廣播公司（BBC）合作，伊實際前往造幣四國訪問，做成專題廣播節目。佇43分鐘的Nigeria單元內底，伊講著Nigeria有利經濟發展的條件，包括人口濟，年紀閣輕；人民有企業精神、重視教育；國家資源豐富，尤其是石油；政府開始一寡私有化政策等等。

當然伊嘛講著問題佮挑戰，比如政府治理、貪汙、基礎建設尤其是電力供應不足等等。遮的攏是長久以來為人所知的，毋過總講伊是樂觀的，甚至預測，只要Nigeria好好利用本身豐富的天然氣來解決發電供電的問題，經濟成長率就可能uì 7%跳到10%、12%。

頂個月，根據Bloomberg通訊社報導，O’Neill表示，Nigeria現任總統Jonathan若是選輸落台，國外的投資者會較有信心、市場的反應會較好。

O’Neill講了真保守，《經濟學人》則是表明支持反對黨的Buhari，所持的理由是Jonathan政權的貪汙實在太嚴重，治國佮對付叛軍嘛攏無才調。雖然前將軍Buhari捌佇30年前透過政變上台、實行獨裁統治，人權佮經濟的紀錄攏真䆀，毋過伊這馬的表現有較民主化矣，上重要的是，伊表現出打擊貪汙的決心，而且是出身北部的Muslim，會較有正當性佮手段來對付Boko Haram。

《經濟學人》講，若是一定愛選一个，in甘願以「沉重的心情」選Buhari。

Nigeria的種族佮宗教分歧本來就真複雜，這幾年來的經濟成長其實嘛加深貧富不均。現在大選佇吵鬧中延期，閣增添不安定因素。

凡勢這馬批判O’Neill的長期預測嘛猶閣傷早，毋過對照一年前後全球媒體對Nigeria的報導焦點，uì「造幣四國」的光彩，到動亂可能分裂的慘況，或者這閣是一个例，忽略政治因素的經濟分析，非常可疑。END

註：本文台文書寫用字係依據教育部公布標準，請參考教育部《臺灣閩南語常用詞辭典》網路版。